Ярышлар беренче тапкыр 2022 елда үткәрелгән иде. Шуннан бирле турнир ел саен Алабуга шәһәрчеге территориясендә оештырыла.

Турнирның рәсми өлеше «Моң» этно-квартеты чыгышы һәм «Сорнай» фольклор ансамбле прологы белән башланып китте. Шуннан соң район күләмендә Коръән укучылар бәйгесендә җиңүчеләр Коръән һәм дога укыды.

Турнирда катнашучыларны һәм кунакларны Алабуга муниципаль районы башлыгы Рөстәм Нуриев сәламләде.

«Хөрмәтле кунаклар! Радик Мөхәрләмовичка бу бәйрәмне үткәрергә, әлеге традицияне саклап калырга һәм дәвам итәргә ярдәм иткәне өчен зур рәхмәт әйтәсем килә. Бүген шулай ук ярминкә дә уза. Мин безнең чакыруны кабул иткән, бирегә килгән һәм «Туган Батыр» турнирында катнашкан һәркемгә бик рәхмәтле», – диде ул.

Татарстан Республикасы мөселманнары Диния нәзарәте мөфтиенең беренче урынбасары Илфар хәзрәт Хәсәнов Камил хәзрәт Сәмигуллинның сәламләү сүзләрен җиткерде.

«Без бу вакыйганың үсүен, аның этнофестивальгә әверелүен телибез. «Туган Батыр»ның юнәлешләре күп – Казанның яңа Камал театрында спектакль сәхнәләштерелде. Бу турнирлар да, фестивальләр дә; барлык федераль платформаларда чыккан мультфильм да, драматург Зөлфәт Хәким язган әкият тә, һәм шулай ук комикслар да», – диде турнирны ачу тантанасында «Туган Батыр» проектына нигез салучы Радик Абдрахманов.

Катнашучыларга һәм кунакларга шулай ук Алабуга дәүләт музей-тыюлыгы генераль директоры Гөлзада Руденко, «Алабуга» махсус икътисади зонасы генераль директорының резидентлар белән хезмәттәшлек, инженерлык потенциалын үстерү һәм эксплуатация буенча урынбасары Тимур Минһаҗев, Бөтендөнья татар конгрессы Башкарма комитеты җитәкчесе урынбасары – ТР бүлекчәләре белән эшләү комитеты җитәкчесе Ирек Шәрипов, Кыргызстан Республикасы консулы Эрик Бейшембиев, иеромонах, Алабуга чиркәү округы благочинные Кирилл Забавнов, шулай ук Татарстан Республикасында Террорчылыкка каршы комиссия аппараты җитәкчесе ярдәмчесе Әдилә Фәттахова сәламләү сүзләре белән мөрәҗәгать итте.

Рәсми өлештән соң кунаклар алдында «Эридан» мода театры чыгыш ясады.

Аннары шәһәрлек мәйданчыгында ярышлар дәвам итте. Өлкәннәр өчен турнир программасы җиде этаптан тора иде. Укчылар мишеньгә ук атуда ярыштылар, 3D-атуда катнашты, классик стойкадан һәм тизлеккә атты. «Джамба» мишененә ату аерым этап булды.

Балалар өчен программа дүрт дисциплинаны үз эченә алган иде.

Янәшәдә мастер-класслар эшләде. Кунаклар үзләрен рәсем ясауда һәм чүлмәк ясауда сынап карый алды. Шулай ук чарада катнашучылар традицион җәя ясарга өйрәнде.

Аерым мәйданчык махсус хәрби операция ветераннары өчен маскировка челтәрләре үрүгә багышланган иде.

Кул эшләнмәләре ярминкәсендә дә тормыш кайнап торды. Сәүдә рәтләрендә бәйләнгән уенчыклар, стимпанк стилендәге, агач эшләнмәләр, татар символикасы төшерелгән аксессуарлар, кием-салым, өйдә әзерләнгән кондитер әйберләре һәм эчемлекләр тәкъдим ителде, диелә «Татар-информ» хәбәрендә.